សាកលវិទ្យាល័យវិទ្យាសាស្ត្រសុខាភិបាល (ស.វ.ស) បានរៀបចំពិធិបើកសិក្ខាសាលាស្តីពីការបូកសរុបសមិទ្ធផលឆ្នាំ២០១៧ និង ទិសដៅផែនការឆ្នាំ២០១៨របស់សាកលវិទ្យាល័យវិទ្យាសាស្ត្រសុខាភិបាល។
ពិធីបើកសិក្ខាសាលានេះ បានប្រព្រឹត្តទៅក្រោមអធិបតីភាពរបស់ឯកឧត្តមសាស្ត្រាចារ្យ សាផុន វឌ្ឍនៈ សាកលវិទ្យាធិការនៃសាកលវិទ្យាល័យវិទ្យាសាស្ត្រសុខាភិបាល ឯកឧត្តមសាស្ត្រាចារ្យ អ៊ុង សំអាន និង ឯកឧត្តមវេជ្ជបណ្ឌិត មាន ឈីវុន ទីប្រឹក្សាអម ក្រសួងសុខាភិបាលទទួលបន្ទុកសាកលវិទ្យាល័យវិទ្យាសាស្ត្រសុខាភិបាល ព្រមទាំងវត្តមានចូលរួមរបស់ថ្នាក់ដឹកនាំ មន្ត្រីរាជការ និងបុគ្គលិកដែលអញ្ជើញមកពីគ្រប់ អង្គភាពទាំងអស់នៃស.វ.ស សរុបចំនួន១១០នាក់។
សិក្ខាសាលាដ៏មានសារៈសំខាន់នេះ នឹងប្រព្រឹត្តទៅរយៈពេល២ថ្ងៃ ចាប់ពីថ្ងៃទី ២១-២២ ខែកុម្ភៈ ឆ្នាំ២០១៨ ក្នុងគោលបំណងសំខាន់គឺដើម្បីផ្តល់ឱកាសដល់មហាវិទ្យាល័យ សាលា ការិយាល័យ និងផ្នែកនានាក្រោមឱវាទស.វ.ស អាចបង្ហាញអំពីសមិទ្ធផលដែល សម្រេចបានក្នុងឆ្នាំ២០១៧ និង ពិភាក្សាកែសម្រួលសូចនាករគោលដៅរៀបចំលើក ផែនការប្រតិបត្តិឆ្នាំ២០១៨។
ថ្លែងក្នុងឱកាសបើកសិក្ខាសាលានេះ ឯកឧត្តមសាកលវិទ្យាធិការបានមានប្រសាសន៍រម្លឹក អំពីចំណុចសំខាន់ៗដែលត្រូវយកចិត្តទុកដាក់បន្ថែម នូវអ្វីដែលបានលើកក្នុងផែនការ យុទ្ធសាស្ត្រស.វ.ស.ឆ្នាំ២០១៤-២០១៨ ព្រមទាំងផ្តល់នូវអនុសាសន៍ល្អៗជូនដល់ អង្គសិក្ខាសាលាសម្រាប់រៀបចំផែនការប្រតិបត្តិឆ្នាំ២០១៨ សំដៅធ្វើយ៉ាងណាឱ្យការអនុវត្ត ការងារទទួលបានជោគជ័យល្អប្រសើរ និងមានប្រសិទ្ធភាពកាន់តែខ្ពស់បន្ថែមទៀត។

Posted on: 02/21/2018 1:25:50 PM